ஜனநாயகம் !
பட்டினிப்போர் பல கண்டோம்
அறப்போரால் உரம் கொண்டோம்
அடங்காமல் அடக்கி வென்றோம்
பாரதத்தின் மாண்பு அது - ஜனநாயகம் !
எண்ணடங்கா உயிர்த்தியாகம்
உணர்வுகளால் செய்த யாகம்
நாங்கள் கொண்ட தேசநேசம்
ஆதிக்கத்தின் அழிவு அது - ஜனநாயகம் !
செக்கிழுத்தார் கல்லுடைத்தார் - தினம்
அடிபட்டார் புண்ணுற்றார் - மனம்
வளர்த்தெடுத்த சுதந்திரத்தீயின் - சினம்
தாங்காது அந்நியன் தகித்தான் - ஜனநாயகம் !
பெற்ற உரிமை போற்றப்படும் - என்றும்
நாட்டின் நன்மை பேணப்படும் - பாரதம்
உலகின் முதலாய் நிலைநாட்டப்படும் - அஞ்சோம்
இளைஞர் நாங்கள், காப்போம் - ஜனநாயகம் !
கடலின் அழுக்கு சுவையாகும்
வானின் அழுக்கு மழையாகும்
மனிதன் அழுக்கு குணமாகும்
நம்பிக்கையே நாளைய வெளிச்சம் - ஜனநாயகம் !
