"mARinOm" "மாறினோம்"

மாறினோம் !

ஓட்டுக்கூரை கண்ணாடி வழியே

லேசான வெளிச்சம் வந்து எழுப்பியது ;


சோம்பலுடன் இன்னும் கொஞ்ச நேரம்

படுத்து எழுந்தபோது குயில் கூவியது ;


கொல்லைக்குப் போய் ,கிணற்றடியில்

பல் துலக்கியபோது மல்லிகை மணத்தது ;

வாளியில் இறைத்துத்  தலையில் ஊற்றிய நீர்

இதமான சுகம் குளிரக் கொடுத்தது ;

வாசலில் சாணி தெளித்துக் கோலம்

போட்ட மனையாளின் உதடு சிரித்துக் கனிந்தது ;

நாங்கள் வளர்த்த 'ஆ' வின் பாலில்

போட்ட காப்பி கமகமத்து நிறைந்தது ;

திண்ணையில் சற்றே சாய்ந்து உட்கார

குழந்தைகள் ஓடி வந்து மேலே விழுந்தது ;

அக்கம் பக்கமும் சொந்தமும் வந்தமர்ந்து

தன் கதை , ஊர்க்கதை பேசிக்களித்தது ;

பையன்களும் பெண்களும் சந்தோஷமாய்ப் பேசி,

சென்ற பள்ளிக்கூடம் பக்கத்தில் இருந்தது ;

நிதானமாய் அமர்ந்து சாப்பிட்ட சோறுவகை

நெஞ்சையும் நிறைத்து நிம்மதியைத் தந்தது ;

அழுத்தாத வேலையும் அளவான உழைப்பும் கூடி

தேவையான வருமானம் தடங்கலின்றி ஈந்தது ;

சாயங்காலம் குழந்தைகள் அனைத்தும் சேர்ந்து

விளையாடிய காட்சியில் மனம் கொள்ளை போனது;

வெளி மாடத்தில் விளக்கு வைத்து ஊர்ஜனம் அத்தனையும்

வீதியின் தூய காற்றை வெளியமர்ந்து ரசித்தது ;

அமைதியான இரவுப் போதில் கவலையின்றி படுத்தபோது

ஆழ்ந்த உறக்கம் வந்து ஆறுதலாய் அணைத்தது ;

விடியற்காலை திடுக்கிட்டு வியர்த்து விழித்தபோது

அற்புதமான இந்தக் கனவு நிதர்சனத்தில் கலைந்தது ;

மனைவியை அருகில் கைகளால் தேடியபோது

அடுக்களையில் விசில் சத்தம் அவளிருப்பை சொன்னது ;

அடுத்த அறையில் எப்போதிருந்தோ எரியும் விளக்கு 

மகனின் எதிர்காலக் கவலைகளை வெளிச்சம் போட்டது ;

அளவுக் குடியிருப்பின் கதவு திறந்து பார்த்தபோது

காலையின் இதம் கவனிப்பாரின்றிக் கிடந்தது ;


அலுவல் அகம் தந்த அகம் இல்லா அலுவல்களின்

தளர்வையும் மீறி ஓட நிர்பந்தம் துரத்தியது ;


வாழ்க்கையை விற்றுவிட்டு வசதி தேடும் நாகரிகம்

பலவந்தப் பிடியாய் இங்கு எல்லோரையும் இறுக்கியது .