"Nagardhal" "நகர்தல்"

OM VENKATESAYA !

நகர்தல் !

சுவற்றில் சுண்ணாம்பு பெயர்ந்த 

இடங்களில் காந்தி , நேரு , மாரியம்மன் 

எங்கள் தெரு கூனன்  -  எல்லாரும் 

இஷ்டம்போல் இருந்தார்கள் .

ஜன்னலுக்குள் விரல் விட்டுக் கொண்டிருந்த 

மரக்கிளையில் கூத்தாடிப்பறவை ஒன்று 

விடாமல் விசிலடித்து உள்வெளியை 

நிறைத்துக் கொண்டிருந்தது !

தலைக்கு மேல் மின்விசிறி 

தர்ரீம் தர்ரீம் என்று 

ஒரு முழத்து ஒட்டடையை 

கஷ்டமாய் சுமந்தது !

நல்ல தடித்த பல்லி ஒன்று 

மிக லேசாகப் பதுங்கி - சரக் - என்று 

நாக்கு நீட்டி ஏமாந்து 

பூச்சியை கோட்டை விட்டது !

நாற்பது வயசுக்கு குறைவில்லாத 

வழுக்கைத் தலை கடிகாரம் 

நாலு மணியைப் பிடிக்க 

தட்டுத் தடுமாறி நகர்ந்து கொண்டிருந்தது !

மூணேமுக்கா காரன் செம்மண்ணில் 

கிளப்பி விட்ட புழுதியை வெல்ல முயன்று 

பக்கத்து சீட் பரசுராமன் துண்டில் 

தும்மலிட்டுத் தோற்றார் !

புது நெல்லின் மணம் வயக்காட்டிலிருந்து 

சாணத்துடன் கலந்து வந்து ... - பட்டணம் பொடி 

பலவந்தமாய் மூக்கில் புகுந்து 

நையாண்டி செய்தது !

"டீ சார் !" டேபிளில் டொப்பென்று 

வைக்கப்பட்டபோது, அந்த கிராமத்து ஆபீஸில் 

எனக்கும் ஒரு வேலை இருக்கிறதோ ?

என்று வீட்டிற்குக் கிளம்பத் தயாரானேன் !