ஆரூரா! தியாகேசா!!

 

ஆரூரா! தியாகேசா!!

 

ஆழியின் நாயகன் , மார்தனில் கொண்டோன்

ஆழிசூழ் பூமியை , ஊழியில் கொள்வோன்

ஆழியின் தேரிலே , அகிலமே கண்டான்

ஆழியே அகிலமே, தானென நின்றான் !

 

கண்டவர் விண்டுளர் விண்டவர்  கண்டுளர்

கண்டுளேன் விண்டுளேன் தியாகேச ஈசா !

கண்டதும் உன்பதம் கொண்டதும் உன்பதம்

அண்டினேன் உன்தலம் விண்தலம் வேறோ ?

 

ஆரூரா! தியாகேசா!! ஆரூரா! தியாகேசா!!

 

ஆருயிர் கொற்றவன் ஆரூரில் அரசன்

பல்லுயிர் காரணன் வன்மீகநாதன்

என்னுயிர் நாயகன் வீதி விடங்கன்

நல்லுயிர் காவலன் தியாகேச ஈசன் !

 

நோக்கினேன் உன்முகம் நோக்கமே நீக்கி  

போக்கினேன் என் அகம் உன்னையே தேக்கி

சொக்கினேன் என் விழி சொக்கனை நோக்கி

ஆக்கினேன் நல்வழி பாபங்கள் போக்கி

 

என்னிடம் உன்னிடம் அவனிடம் ஆக

காலிடம் காலனும் தன்கதி நோக

எவ்விடம் ஆகினும் கண்டமே போக

தேர்வடம் பற்றுவோம் ஈசனை ஏக !

 

தீர்த்தமும் கமலம் ஆலயம் கமலம்

அம்பிகை நாமமும் அருள் தரும் கமலம்

நிர்மலம் தந்திடும்  ரூபமே கமலம்

நித்தமும் நாடுவோம் அவள் பாத கமலம் !

 

 ஆதியும் அந்தமும் இல்லாத ஊரோன்

ஆழியின் பேர் கொண்ட அற்புதத் தேரோன்

ஜனனமே முக்தியாம் தியாக விநோதன்

மரணமே நிர்பயம் ஆக்கிடும் நாதன் !

 

சுள்ளேனச் சுட்டதுன் உள்ளெனக் கண்டால்

கண்ணெதிர் மாயையும் பொய்யெனக் கண்டால்

விண்திரை நீங்கவே விதியினைக் கண்டால்

உன் உளம் ஓயும் தியாகேசனைக் கண்டால் !

 

விண்வழி செல்லுவோர் மண் வழி வந்தார்

பகலவன் மறையவே பகலவன் கண்டார்

மெய் கொண்ட மானிடர் மெய் கண்டு நின்றார்

தீராத ஆனந்தம் புற்றிடங்கொண்டார் !

CLICK THE LINK TO SEE THE VIDEO --- 

https://youtu.be/YwH0vN8lghU?si=EFJQYfj1c_rsdGoM

 

 

“ஏதும் வேண்டா ! ”

 “ஏதும் வேண்டா ! ”

யாரும் வேண்டா தகிக்கும் தனிமையிலை 

ஏதும் வேண்டா தவிர்க்கும் தனிமை ! 

நாடும் நாடா துதிக்கும் ஒருமையிலை

நாடும் நாடாது உதிக்கும் ஒருமை !

போகும் போதாது போகும் வறுமையிலை  

போகும் போதொன்று போகும் வறுமை !

சேரும் போதொன்று சேரும் வரவுயிலை 

சேரும் போதொன்று சேரும் வரவு !

கட்டும் கட்டுண்டு நிற்கும் பேதமிலை 

கட்டும் கட்டாண்டு நிற்கும் பேதம் !

முட்டும் அடங்காது முட்டும்  எண்ணமிலை 

முற்றும் அடங்காது முற்றும் எண்ணம் ! 

அடிகோலும்  அடி கொண்டு கோரும் நாட்டமிலை 

அடிகோரும் அடி  கொண்டு கோரும் நாட்டம் !

அடி ஏனோ நிற்காது ஓடும் ஓட்டமிலை 

அடியாரோ நிற்காது ஓடும் ஓட்டம் !

 

புவி கொள்ளும் தன் தொடர் காணும் ஆவலிலை 

புவி கொள்ளும், தன் தொடர் காணும் ஆவல் !

புவி கொள்ளும் நாள் தேடி அஞ்சும் நெஞ்சமிலை 

புவி கொள்ளும் நாள் தேட மிஞ்சும் நெஞ்சம் !

கூடக் கூடொன்று நாடும் ஏக்கமிலை 

கூடும் கூடாது போகும் ஏக்கம் !

நாடிக்  கேடின்றி தேங்கும் தேக்கமிலை 

நாடிக்  கேடின்றி தேங்கும் தேக்கம் !

தன் போல் தன் முன்னதன் போல் தோற்றமிலை  

தன் போல் தன் முன்-அதன் போல் தோற்றம் !

தன்பால்  தன் பின்னதன்பால்  கொள்ளலிலை  

தன்பால் தன் பின் - அதன் பால் கொள்ளல் !

கொண்டோர் கண்டதைக் கொண்டோர் மீதமிலை 

கொண்டோர் கண்டு - அதைக் கொண்டோர் மீதம் ! 

கண்டோர் கொண்டதைக் கண்டோர் தோற்றமிலை

கண்டோர் கொண்டதைக் கண்டோர் தோற்றம் !

புரிந்தும் புரியாது போகும் போக்குமிலை  

பிரிந்தும் பிரியாது போகும் போக்கு !

நேர்ந்தும் நேராது போகும் நோக்கமிலை 

நேர்ந்தும் நேராது போகும் நோக்கம் !

"என்" பிள்ளைத்தமிழ் !

"என்" பிள்ளைத்தமிழ் ! 

திடீரென்று அது நடந்தது - இதோ இப்போதுதான் !

பத்து வயது குழந்தையாக மாறிப்போனேன் !


கிராமத்து வீட்டு முற்றத்தில் குதித்து ஓடினேன்,

வாசலுக்கும் கொல்லைக்கும் ஆனந்தமானேன்!


லேசாக எழும்பி கிணற்றுள் பார்த்தேன் - ஏய் !

என்ன அம்மாவின் அதட்டலைக் காணோம் ?


தட்டான்கள் சுற்றிவந்து சங்கீதமிட்டன,

எங்கே போனாய் நீ, வா மாமரம் சுற்றுவோம் !


"எங்கே நம் கூட்டாளிகள் ? தோழிகள் எங்கே ? " - தேடினேன் !

தோட்டத்துக் கால்வாய் காய்ந்தது , "என்னைக் கேட்டால் ?"


அட ! என் வண்ணத்துப்பூச்சி வந்துவிட்டது -

" இது என்ன கோலம்? " - சிரித்து சிறகடித்தது !


"தொலைந்ததை மீட்க வந்தாயா ?" - தேன் குடித்தது ,

"தொலைந்தது நீங்கள் அல்லவா ? பிறகென்ன ?"


"குழந்தைகள் எங்களை ஏறெடுத்தும் பார்ப்பதில்லை,

நீ குழந்தையானாய், சரி ! உன் மகன் எங்கே?


நாங்களும் தொலைந்துதான் பிறக்கிறோம்,

வண்ணங்களை விடுவதில்லையே?" படபடத்தது !


"உன்னொத்தவர்கள் சாதிக்கச் செல்கிறீர்களே ?

எங்கள் கீதம் வருடலின்றி , அது என்ன வேகம் ? வறண்டு !


நீ படித்த கூடம், நடந்த வரப்பு, வளர்ந்த வீடு,

மகிழ்ந்த நண்பர்கள் எல்லாம் நானே ! நான் மட்டுமே !


உன் சுகந்தங்கள் ஏமாற்றாமல் அளிக்கிறேன் - வா !"

எண்ணற்ற வண்ணத்துப் பூச்சிகள் என் மேலமர்ந்து !


ஆகா ! என் மழலையின் சுகம் நிகழ்ந்து மலர்ந்தது,

நாங்கள் பல பூக்களுக்கு பறந்து தாகம் தணிந்தோம் !


என் மாட்சிமை, கனம், வேகம் - குழந்தை தாங்குமா ?

" என்ன இது குழந்தை மாதிரி ? " - என்றாள் இவள் !


நான் அழுது கொண்டிருந்தேன் - நிற்காமல்,

தொலைந்த குழந்தைகள் அனைத்தும் நானாய் !

    

  

"அஸ்தமனம் உதயம்" "Asthamanam Udayam"

அஸ்தமனம் உதயம்!

அஸ்தமிக்கும்போதும் உதிக்கும் 

இப்போது உச்சியில் உதிக்கிறது 

மறைதலும் ஒரு உதித்தல் தானே - அப்போது ?

உச்சம் ஏறும்போது குளிரும் 

நடுங்காத அழகான குளிர் காணும் 

பாதி தாண்டிய மிதப்பான அமைதி - இப்போது ?

மறையும் திசை தெரிகிறதா ? பயமா? 

உதயத்தின் உதயம் அறிவோம் அன்றோ -

அது குழந்தையின் பாதம் - செக்கச்சிவந்து!

பயணித்து மேலேறி நானா - பொய் !

சுற்றலில் இடமாற்றுப்பிழை - மெய் !

பிழை மாற்றும் இடமா - அஸ்தமனம் ?

திடமான அந்திமச்சிரிப்பு - குழந்தை கெட்டது !

கடைசி பாதம் - அதற்குள் மேற்கா ?

நகரவே இல்லை என்று புரிந்து சிவக்கும்!

என்னவென்று உணரவே இல்லையே ?

உச்சியிலிருந்து நோக்கினாயே இதை அப்போதுமா ?

சுற்றல் கண்டிருந்தேன் சேர்ந்தேன் - நான்!

சருகுகள் காலத்தின் கட்டாய மாற்றம் 

அது சரி ! நீ நின்றேன் என்றதும் - சுற்றல் 

விடவில்லையான காரணமும் உண்மையா ?

தகித்தாயே சில சமயம் அகங்காரமாய் 

உன் கரைதலில்தான் உலகம் உய்க்கும் - என்று 

சுள்ளென்று உரைத்தாயே நெருக்கத்தில்?

இயக்கத்தின் காரணமும் வெளிச்ச மூலமும் 

உதித்த அர்த்தங்களும் - இதோ வரும் 

இரவின் அணைப்பும் உன் மூலமா?

நான்தான் உதித்தேன் , சுற்றினேன் , கனன்றேன் 

என் இயக்கம் ஏதுமின்றி - ஏதுமில்லா இயக்கத்தில் 

ஒரே இடத்தில் பயணித்து அஸ்தமனம் உதயம் !

"தீபாவளி வந்துடுச்சு"

தீபாவளி வந்துடுச்சு !

தீபாவளி வந்துடுச்சு 

தெருவெல்லாம் சரவெடி !

விடிகாலை எழுந்திரிச்சு 

வெடி வெடிப்போம் வாங்கடி !

எண்ணெய் வெச்சு குளிச்சாச்சு 

புதுச்சொக்காய் போடணும் !

பூப்போட்ட பாவாடை 

சுத்திச்சுத்தி  ஆடணும் !

பாப்பா, நீ பயப்படாதே 

அக்கா என் கைபுடி ,

அண்ணங்காரன் வைக்கப்போறான் 

அதிரவைக்கும் யானை வெடி !      

ராக்கெட்டு போவுது பார் 

சீறிக்கிட்டு வானிலே !

பாம்பு வெடி பாஞ்சு வரும் 

பாத்துப்போடி ரோட்டிலே !

புஸ்வாணம் மத்தாப்பு 

சங்குசக்கர வாணமும் ,

கேப்புவெடி பட்டாசும் 

நாள்பூரா வெடிக்கணும் !

அம்மா செஞ்ச கைமுறுக்கு 

கம கமன்னு மணக்குது !

அத்தை தந்த அல்வாவும் 

சப்புக்கொட்ட வைக்குது !

அடுத்த வீட்டு தேன்குழலும் 

அதிரசமும் வருகுது !

நம்ம வீட்டு மைசூர்பாகு 

தெரு முழுக்க சுவைக்குது !

பலகாரம் பல இனிப்பு 

சேர்ந்து நாம உண்ணலாம் !

தினந்தினமும் தீபாவளி 

வந்துபோனா தேவலாம் !

  

"ஜனநாயகம்" " Jananaayagam"

ஜனநாயகம் !

பட்டினிப்போர் பல கண்டோம் 

அறப்போரால் உரம் கொண்டோம் 

அடங்காமல் அடக்கி வென்றோம் 

பாரதத்தின் மாண்பு அது - ஜனநாயகம் !

எண்ணடங்கா உயிர்த்தியாகம் 

உணர்வுகளால் செய்த யாகம் 

நாங்கள் கொண்ட தேசநேசம் 

ஆதிக்கத்தின் அழிவு அது - ஜனநாயகம் !

செக்கிழுத்தார் கல்லுடைத்தார் - தினம் 

அடிபட்டார் புண்ணுற்றார் - மனம் 

வளர்த்தெடுத்த சுதந்திரத்தீயின் - சினம் 

தாங்காது அந்நியன் தகித்தான் - ஜனநாயகம் !

பெற்ற உரிமை போற்றப்படும் - என்றும் 

நாட்டின் நன்மை பேணப்படும் - பாரதம் 

உலகின் முதலாய் நிலைநாட்டப்படும் - அஞ்சோம் 

இளைஞர் நாங்கள், காப்போம் - ஜனநாயகம் !

கடலின் அழுக்கு சுவையாகும் 

வானின் அழுக்கு மழையாகும் 

மனிதன் அழுக்கு குணமாகும் 

நம்பிக்கையே நாளைய வெளிச்சம் - ஜனநாயகம் !

"காலம்" " Kaalam"

காலம் !

காலம் என்னை உற்றுப் பார்த்துக் கொண்டிருந்தது !

என்னோடு எப்போதும் பயணிக்கும் நண்பன் இது ;

நான்  மந்தித்து தங்கி விடும் தருணங்களில், 

இதன் பொதுத்தன்மை கேள்விக்குறியாகி விடும் !

எப்போதும் ஏன் என்னுடன் சஞ்சரித்துக்கொண்டு ,

நிலையாமல் நிலைக்கும் மாமுனி - என் நிலையாமை ?

கிரகங்களின் சுற்றல்தான் நீயா எனில் எப்படித் தங்கினாய் ?

பல வெளிகளுக்கப்பால் நீண்டு கிடக்கிறது இவன் தோற்றம் !

கருவறையில் அவன் இருப்பதுபோல இவன் என்னோடு !

அவன் அங்கு மட்டும்தான் என்றால் தங்குதலின்  பொருள் ?

ஞாலத்தின் விரைதலில் காணக்கிடைப்பானா - முயன்று பாரேன் !

அஸ்தமனத்தின் புலரல் இவனால் என்று காரணித்து - விடு ,

உன் மூத்த கணங்களில் நிறுத்த முயல்வாய் சுயநலமாய்.

பெண்பாலாய் அவன் காண விருப்பம் - நானோ , அவனோ ?

பரந்து  கிடக்கும் அவள் உன் மேல் படிய நீ உணர்வாயா ?

காத்திருக்கிறேன் அவளோடு ஒடுங்கி நிகழ்ந்து 'காலமாக' !

என் மேலும் படிவாள் நீள் நிலையின் உண்மையாய் அன்று !

காற்றும் மோனமும் முயன்று கொண்டே இருக்கிறது , முடியாமல் ;

கணிக்க முடியா வேகமும் நிற்றல்தானே - காலம், காலமாக !

என்னுள் வியாபிக்கிறாள் நிலையாக , இறந்த காலம் !